@Vusal347
Tarı qucağında qoca tarzənin,
Bir hava çalmaya, dəhşətdi-dəhşət.
Xəstə halsız ola, təbib dərd bilən,
Yaxına gəlməyə, dəhşətdi-dəhşət.
Gözün günahından düşəsən qana
Buzdan od alasan, varlığın yana
Dərdin səpələnə Azərbaycana,
Sevgilin bilməyə, dəhşətdi-dəhşət.
Yüz ömürdə bircə dəfə yaz ola,
Min kədərdə bir ötəri naz ola
Köhnələ məzarın tanınmaz ola,
İlk eşqin ölməyə, dəhşətdi-dəhşət.
Şah olsa da dərdi çoxdu qananın,
Külü çıxmaz, mənim kimi yananın.
Sənin yaşın cığır sala, cananın
Gözləri dolmaya, dəhşətdi-dəhşət.